Статьи и обзоры nachodki.ru

«Бары биир киһи курдук» девиһинэн

Родительская категория: ROOT Категория: Новости школы Опубликовано: 07.03.2018 Автор: Альберт Борисович

 

«Бары биир киһи курдук» девиһинэн

 

Олунньу 22 күнүгэр Д.А. Петров аатынан Ытык Күөл 2-с №-дээх орто оскуолатыгар улууска сылын аайы ыытыллар алын сүһүөх кылаас  үөрэнээччилэригэр эдэр армеецтар күрэхтэрэ тэрээһиннээхтик ааста.

        Кэнэ5эскитин А5а дойдуну көмүскээччи байыаннай формалаах 2 – 4 кылаас уолаттара хааман чиккэстилэр, элбэх моһоллоох эстафетаҕа кыахтарын, күүстэрин көрдөрөн, сүүрэн күппээрдилэр, чобуотук хоһоон ааҕан соһуттулар, викторина ыйытыыларыгар эппиэттээн өркөн өйдөрүн былдьастылар, макет күрэҕэр байыаннай тиэмэни бэрткэ билэллэрин көрдөрдүлэр. Күрэх күүстээх сыаналааччыларынан Таатта уонна Чурапчы улуустарын байыаннай комиссара Андреев Н.М., улуустааҕы «Ытык Аҕа” сүбэ салайааччыта Попов Н.Е., улуус казактарын түмсүүтүн атамаана Рахлеев И.Ф. буоллулар. Барыта 11 хамаанда кытынна: Дьохсоҕон, Чымынаайы, Уолба, Чычымах, Харбалаах, Туора Күөл, Д.А. Петров аатынан 2-c №-дээх оскуола икки уонна Алампа аатынан  Ытык Күөл 1-кы №-дээх оскуола үс хамаанда туруордулар. Противогаз кэтии, пластунунан сыыллыы, бааһырбыт киһини илдьии, граната быраҕыы курдук элбэх сыраны-сылбаны, бэлэми, сылбырҕа буолууну ирдиир эстафета күрэҕэр бастакы, иккис миэстэлэри  ЫКОО-2 хамаандалара, үсүһү Туора Күөл ыллылар. Хоһоон ааҕыытыгар Попов Алик (Дьохсоҕон), Габышев Эрчим (ЫКОО-1), Капитонов Гоша (Уолба); викторинаҕа Кириллин Айтал (ЫКОО-1), Варламов Алеша, Акимов Юра (иккиэн ЫКОО-2) бириистээх миэстэ5э тигистилэр. Тыҥааһыннаах киирсии түмүгүнэн байыаннай маршировкаҕа хайдах миэстэ ылбыттарынан миэстэ тахсан кэллэ. Ол курдук биэс этабы ааһан, саамай элбэх очкону ылан, бастакы миэстэни ЫКОО-2 бастакы хамаандата, иккиһи ЫКОО-2 иккис хамаандата, үсүһү Уолба оскуолата ылан үөрдүлэр-көттүлэр.

Манна даҕатан эттэххэ оскуола иһинэн 5-11 кылаас уолаттарыгар Аҕа дойду көмүскээччитин Күнүнэн «Бары биир киһи курдук» девиһинэн байыаннай-спортивнай көрүү тэрилиннэ. Үөрэтэр, дьарыктыыр хабааннаах тэрээһиҥҥэ уолаттар хамаанданан байыаннай хаамыы, бастакы медицинскэй көмө, семафор, Арассыыйа аармыйатын историятын билии курдук күрэхтэри аастылар. Тэрээһин чэрчитинэн Арассыыйа аармыйатыгар сулууспалаабыт Николаев Д.П, Степанов У.Н. кэлэн, эдэр армеецтарга диспукка кыттыстылар, сүбэ-ама биэрдилэр.  

 Маннык күрэхтэр кэнэҕэс ыччакка улахан суолталаахтара, Ийэ дойдуну таптыырга, көмүскүүргэ, патриотизмҥа, дисциплинаҕа иитэллэрэ саарбаҕа суох.

 

Антонина Яковлева

 

Просмотров: 119