Статьи и обзоры nachodki.ru

Оскуола саастан идэҕэ уһуйууга туһаайыллыбыт семинар

Родительская категория: ROOT Категория: Новости школы Опубликовано: 20.12.2017 Автор: Альберт Борисович

Оскуола саастан идэҕэ уһуйууга туһаайыллыбыт семинар

 

    

 

         Д.А. Петров аатынан Ытык Күөл 2-с №-дээх орто оскуолатыгар регионнааҕы идэни биэрэр үөрэхтээһин маастардарын, технология учууталларын семинара буолан ааста. Семинар-практикум сыалынан технология, үлэ, идэни биэрэр үөрэхтээһин  учууталларын маастарыстыбаларын, таһымнарын үрдэтии, саҥа технологияны киллэрии уонна ону араас ньыманан көрдөрүү, тарҕатыы буолла.     Чурапчы 1 №-дээх, Чөркөөх, Тыараһа, Баайаҕа, Чымынаайы, Дьохсоҕон, Даайа Амма, Ытык Күөл 1 №-дээх оскуолаларыттан, Таатта лицейыттан, «Сатабыл» эбии үөрэхтээһин кииниттэн барыта  30 учуутал сырытта.  Тэрээһини директор Сергеев Д.В. уонна  кини солбуйааччыта Попов И.Н. оскуола үлэтин сырдаттылар, эҕэрдэ тыл эттилэр. Кинилэр орто үөрэхтээһин олохпут ирдэбилэ буолбутун, инникитин Таатта улууһугар олохтоох ыччакка бэйэ сиригэр идэни биэрии, үөрэтии суолталааҕын, бу үлэ киэҥ далааһыны ыларын бэлиэтээн эттилэр.

        Маастар кылааһы оскуола үлэ уонна технология учууталлара Бочурова А.А., Петрова А.П. таҥаска уонна тааска ойуу түһэрэр аныгылыы технологияны көрдөрдүлэр, үөрэттилэр. Бу сатабылынан Александра Андреевна, Александра Петровна үөрэнээччилэрэ Неморицына Арина, Федорова Нарыйаана (9 кыл.) «Сарыал» киинигэр ыччат сылыгар аналлаах «Уран тарбахтар» быыстапка-күрэҕэр «Уруһуйдуур дьоҕур» номинацияҕа бастаабыттар. Кыргыттар семинар кыттыылаахтарын дьарыктаатылар, тутан-хабан үөрэттилэр. Бочурова А.А.  иитиллээччилэрэ «Күн сардаҥалара» мода-студия, алын сүһүөх кылаас кыргыттара аҕыйах хонуктааҕыта Дьокуускайга буолбут, республикатааҕы «Бриллиантовые нотки» мода күрэҕэр «Нарисованные платья» коллекцияны көрдөрөн (былаачыйа уруһуйдарын Неморицына Арина, Федорова Нарыйаана оҥорбуттар), 2-c истиэпэннээх лауреат үрдүк аатын ылбыттар.

     Салгыы  Тыараһа орто оскуолатын учуутала Толстякова М.А. сылгы сиэлинэн алта, аҕыс утаҕынан өрөргө үөрэттэ. Кини бу ньыманан харысхаллары, сувенирдары оҥорор эбит.  Туостан сахалыы бастыҥаны, илин кэбиһэри оҥоруу Петрова С.А.  (Чөркөөх),  Яковлева С.И. (Даайа Амма) туостан ыа5ыйа тигии, сиэли ситии ньымаларын көрдөрдүлэр. Норуот маастара, технология учуутала Большакова А.Н. (Чымынаайы) оскуола учууталларын кытта үлэтин уопутун атастаста. Бу кэмҥэ тэҥинэн оскуола  мастарыскыайыгар үлэ учуутала Спиридонов Я.Н. көрдөрүүлээх дьарыгы ыытта. Бэлиэтээн эттэххэ оскуола бэйэтин автодромугар массыынаны ыытарга үөрэтэн, «А» «В» категорияны (Шуткин А.С.), «Швея 2-го разряда» (Никифорова А.Е.), «Столяр 2-го разряда» (Спиридонов Я.Н.) оробуочай идэлэри биэрэр (Никифорова А.Е.) толору кыахтаах.

       Бу курдук оҕо оскуола сааһыттан идэ ыларыгар, олоххо бэлэмнээх буоларыгар туһуламмыт «Идэҕэ уһуйуу, айыы-тутуу маастарыстыбата» семинар-практикум айымньылаахтык ааста. Оскуола салгыы бу үлэни ыытар, кэҥэтэр былааннаах.

        Яковлева А.Г.

 

Просмотров: 224